BLOG

• 上一個BLOG |
• 下一個BLOG |
• 全部

• 彭 氏 兄 妹 雙 面 睇 @ 蘋果日報 (附加特別備註）

  2009-02-03 1:13AM / 標準BLOG / 會員可以看
  

  

  認識彭浩翔及彭秀慧之先，都有一刻想過他們是兄妹，有時會一齊度橋至深宵，在《伊莎貝拉》中，劇后彭秀慧更成為了彭導的編劇。相反，彭浩翔亦會聲演彭秀慧的《 29+1》（註：應為《再見不再見》），今日他們笑笑口澄清，「我哋雖然唔係兄妹，不過感情分分鐘仲好過親兄弟姊妹！」雖無血緣關係，但兩位同樣都是甚麼都要試的雙面人。
  
  

  記者 ：蒙為亮
  攝影 ：楊錦文
  鳴謝 ：DAP JP Wine House

  
  彭秀慧
  香港演藝學院戲劇學院表演系畢業，04年獲獎學金到巴黎研習，05年首度發表自編自導自演作品《29+1》，08年更憑《再見不再見》得到香港舞台劇獎最佳女主角。
  

  
  彭浩翔
  01年，27歲執導首部電影《買兇拍人》即獲香港金紫荊獎最佳編劇，03年第二部作品《大丈夫》更獲香港金像獎最佳新導演，作品《伊莎貝拉》更入選德國柏林電影節之競賽作品。
  

  結緣於Nude
  
  畢竟中國人是保守的，一講全裸，媽咪立刻唔畀講，唔畀睇，唔畀聽。外國當然開放得多，「Nude」一字不但有少少藝術氣質，大家還為藝術而犧牲的人可敬可畏。無獨有偶，全裸也竟然是彭浩翔及彭秀慧相識的開端，認真少少「鹹」，多多趣！

  
  《破事兒》中田蕊妮床戲的一幕，原先十年前想找彭秀慧擔綱演出。

  翔=彭浩翔
  慧=彭秀慧

  慧：又要講我哋相識經過呀？唔好 … …

  翔：哈 哈 … … 每次講番起都真係笑到停唔到口，其實我當年拍完《買兇拍人》之後已經立刻想開《破事兒》，（註：彭兄認識我的時候，是在《買兇拍人》之前，還沒有當上電影導演，他是籌備把其中一個短篇「男的女的」拍成獨立短片，繼續追尋電影夢）我記得好似係97年咁上下。（註：是1999年啊！）《破事兒》第一 part，田蕊妮同陳輝虹咪有場床上戲 ，想搵人Nude但唔用脫星，10年前真係難過登天，唔想搵三級女星情況下，有朋友話有個靚女會舞台劇作全裸演出，我諗住即刻拍板，點知見到真人之後真係… …（嘆氣）… …哈哈… …

  慧：家吓好失禮你呀！

  翔：講笑 … …

  慧：我要澄清一樣 ，當時我係做緊中英劇團《中環廣場上的野餐》，只係最後一幕Black out 時我除晒所有衫，當時個台真係黑到乜都睇唔到，而且都有做好少好少防措施。但我真係估唔到彭秀慧會因為Nude而得到戲行內好多朋友討論，搞到之後接住 兩年做嘅都係情婦同妓女等等，都真係幾弊！
  
  （大註特註：彭浩翔第一次看我的演出應為1999年中英劇團的《轉得快 好世界》，當中我飾演一個劇團女演員的我有一點點性感演出吧，嘿嘿，也不過是露背......然後就讓我跟彭導碰上了。我真正的所謂「全裸演出」，是早在我剛畢業演藝學院後，在1998年演出的瘋祭舞台《中環廣場上的野餐》，就是上文所說的一場戲，在最後一場的一個畫面。而飾演那些情婦、妓女角色，統統都是發生在演藝學院讀書時期的小故事.....哈哈......時序看來顛倒了）
  

  翔：你咁嘅質素都做到情婦、妓女？可見APA 學生應該係同社會脫哂節，你應該去砵蘭街進修一下先，哈哈… …

  慧：(不停打彭浩翔) … …呢一段唔好寫… …

  作弄王 VS 認真花旦

  
  由第一部《買兇拍人》開始，到《大丈夫》、《公主復仇記》、《AV》，
  一部比一部玩得認真。
  
  
  彭導的讀物推介《惡搞研習社》  $133

  全個訪問過程都在嬉笑中度過，一有位「入」，彭浩翔必定不會放過彭秀慧，可憐的彭秀慧全程只能在挨打的狀態，不過彭浩翔就反稱這種詆毀非作弄，只是想試試她的容忍底線，氣得身旁的彭秀慧唔知好嬲定好笑。

  翔：彭秀慧，其實我咁樣做都係為你好，我只係想試練你咋。

  慧：唔緊要，其實我而家對住你，都已經進入化境，你講乜我都會好平靜。

  翔：哈哈，不過講開你性格，其實都真係好認真，而且開會都甚少遲到，的確幾好。

  慧：不過有一次彭浩翔話成個星期都要六點鐘起身開會，我就遲到咗，唔係因為起唔到身，而係無隧巴！

  翔：哈哈，我都記得。

  慧：我發覺有時真係好似前世欠咗你咁，成日都詆毀我，好彩你都未試過鬧我，如果唔係真係喊畀你睇，而且佢呢啲處女座真係好難服侍。

  翔：處女座都幾好，做嘢認真完美主義者嘛！

  慧：所以其實我係好包容同遷就你，不過你真係有少少叻，而且出尾期都算幾準，哈哈。

  翔：你都認真，而且個樣仲有啲似我阿媽，所以先會俾人誤傳我哋係兄妹呢個笑話。
  
  慧：好喇喎，彭浩翔… …

  翔：哈哈，真係喎，仲記得嗰時拍緊《伊莎貝拉》， 啲工作人員全部都以為你係我阿妹。

  慧：所以起初佢哋好似對我特別好咁，不過一知道我唔係就好似對我無咁好！

  翔：心理作用啫，你知唔知點解佢哋咁耐都唔夠膽問吖？你知啦，而家啲家庭好複雜，有好多時明明係有血緣關係嘅兄妹，可以十幾年都唔知。

  慧：但係嗰個一定唔會係我哋兩個囉，唔該！

  
  《三盒會》是彭浩翔年少時創作的短篇小說。

  
  《壹種風流》是彭浩翔的散文結集。  $68

  09年拍住上
  常常都覺得彭氏兄妹是喜愛發展的雙面人，男的在導演工作中有所成功，但越拍得高檔次就越返璞歸真，閒時總愛發手痕寫散文小說，幾乎幾個月出一本書。女的貴為舞台劇劇后，本可藉意踩過界做電視又拍戲，但她又獨愛劇本，度度新橋。他們卻一起大笑聲言：「別人笑我太瘋癲，我笑他們看不穿！」

  
  二人皆認為《伊莎貝拉》所得到的肯定是超乎預期的，
  彭浩翔更笑言這可算是現階段為止最滿意的作品。

  慧：你套十一歲短片幾時上？又話搵我做MC？

  翔： 嗰套係我十一歲用一部VHS攝錄機拍嘅《智勇三熊》。

  慧：其實你咁忙邊有時間寫書呀？

  翔：有，而且小說散文我一定會 keep 住寫，之前都有喺《 蘋 果 》寫些散文，所以出咗一本《壹種風流》，當時都係副刊總編叫我寫的，差不多寫咗成年，而家就喺《cup》寫專欄，我覺得寫字先可以真正表達到自己！

  慧：嘩，突然間講到咁深，拍電影表達唔到咩？

  翔 ： 唔 得 ， 因 為 幾 乎 拍 一 套 就 遺 憾 一 套 ， 基 本 上 我 拍 完  戲 自 己 都 好 少 睇 番 ， 因 為 拍 戲 有 好 多  都 控 制 唔 到 ， budget 、 人 手 、 投 資 者 等 等 ， 寫  就 可 以 隨 心 所 欲 得 毫 無 計 算 。

  慧 ： 都， 情 況 都 有  似 我 ， 做 劇 同 寫 劇 本 我 都 鍾 意 ， 其 實 都 係 創 作 ， 只 不 過 形 式 唔 同 ， 所 以 界 限 同 收 穫 都 會 有 所 不 同 。

  翔：其實你有無諗過學其他人咁試其他媒體演出？

  慧：邊啲係其他人先？哈哈… …

  翔：你知嘅… … 哈哈… …

  慧：無話一定要，但係有都唔會抗拒，不過當然都會以做舞台為依歸，我哋呢啲做慣舞劇台，一做電影就會好容易做得神情太誇張，所以四月我都係re-run番《再見不再見 》！

  翔：嘩！你兜咁大個圈sell 嘢！

  慧：講開之嘛﹗今次會喺演藝做，所以舞台設計上會有好多花款，而且場地又大咗咁多，所以真係好大壓力。

  翔：會唔會再Nude先？Nude可能啲飛會賣得好啲？

  慧：死啦！(再打彭浩翔)

  翔：講吓笑啫……

  後記：
  

  
  萬料不及原來每朝在檀島中一起嘆咖啡、
  看報紙就是當年彭浩翔加彭秀慧的度橋良方。

  
  看過彭浩翔在《壹種風流》入面的一個短章節，內容大概講述彭導對文字的認真，說的不是修辭技巧及押韻鏗鏘等，而是文字的格式，如所有文章不可不中不英，如我好Proud of ，明明有驕傲，不用驕傲，頓時驕傲就變得失禮。還有，開新段應隔兩個格，是按四下Space bar ，省略號是六點等 ，這些認真的執著跟排戲排到幾日唔瞓、飯都唔食的不眠花旦彭秀慧不謀而合，兩個人夾得來，Friend到好似兄妹咁，一定有原因。

  
  《智勇三熊》
  《智勇三熊：彭浩翔的第一次》綜合了一些兒時瘋狂錄像拍攝的首部短片《暑期作業》，08年4月於意大利烏甸尼斯電影節首演，隨後10月在香港亞洲電影節公映，由於反應熱烈，今年再於香港藝術中心公映兩場。
  （小註：我真係會為他做MC呢！）
  
  日 期 ： 2 月 7 日 （ 星 期 六 ）
  時 間 ： 7:30pm 、 9:15pm
  地 點 ： 香 港 藝 術 中 心 AGNES B. 電 影 院
  門 票 ： $80
  查 詢 ： 2734 9009 （ 城 市 電 腦 售 票 處 ）

  《再見不再見》
  劇后彭秀慧勇奪劇后的得獎作，4月將第三度公演。

  日 期 ： 4 月 23 日 -26 日
  時 間 ： 8:00 pm
  地 點 ： 香 港 演 藝 學 院 歌 劇 院
  門 票 ： $270 $300
  查 詢 ： 9446 7094 朱 小 姐