系广州饮早茶想同老人家争位？唔使恨！

       此情此境会谂起咩？呢种会围系门口嘅景象我会谂起电视影嘅十几年前香港银行滞提。而事实非也，呢种场面竟然只系广州陶陶居六点半早茶开门前嘅场景。我去过陶陶居两次饮早茶，亦系在广州咁耐仅有的两次早茶。两次都因为系荔湾广场对面的歌哥KTV同朋友唱午夜场通顶到6点无地方去又无车所以就近行落去第十甫路的陶陶居饮早茶。两次去到门口都大概六点十五分未到六点半开门时间,但同样已经好似照片中围满老人家。照片系上一年夏天第二次去陶陶居时朋友用手机影嘅，何其壮观啊。我地一伙人企系对面街都唔好意思过去，因为成班老人家睇埋去平均年龄唔低于60岁，系得我地几个后生仔二十岁左右竟然来饮早茶。我有过第一次来陶陶居饮早茶经验，知道要上二三楼先近点心出处先可以好快摞到最新鲜又好嘅点心，系一楼等半天都无推车来仲要品种少又无咁靓。一到准备开门我地就唔理咁多一于挤埋去班老人家度。一开闸D人就好似洪潮咁涌入陶陶居霸位。我地企于洪潮最后位置，本以为凭住我地年轻人嘅冲劲与快步一定可以赶超班老人家。由最年轻嘅某同学香港翻来玩嘅表弟Leo同最轻盈小巧嘅小马仔打头阵直奔三楼。上到二楼时发现大部分台已经有人，基本上都系一个阿伯就霸一张可容纳10个人嘅大台。所剩下都唔系最佳位置嘅台同二楼与三楼夹层两张台。我地一心以为三楼老人家无上得咁快，小马仔仲话要搵三楼靠窗边嘅台，由一楼上二楼就不断鼓吹“人地表弟，高D高D”（Leo好似有D俾人老点嘅感觉，哈哈哈）上到三楼大家只有傻眼，全部满座！小马同Leo仲要有个“惊人”大发现系度嗌“原来有电梯嘎！”啊哈哈哈哈……OMG！我地垫后嘅赶紧翻落二楼但都系为时已晚啦。呢度得出个心得就系见到有就要先霸住，有更好再走，唔系就两头唔到岸。无奈我地一行年轻人只好翻落人丁不旺嘅一楼。唉~~真系失礼人啊，成班后生仔同老人家争位饮早茶已经够失礼，最失礼系竟然唔够D老人家争！