公告
- TV Host / Actress / Singer / Voice Talent
藝名：陳靖允
原名:陳迪華
演出經驗：
美國音樂劇 -1984,85與尤伯連納演出 ‘The King And I’ Broadway Musical National Tour 達2年、
’Guy and Doll’、’Hello Dolly’、’Flower Drum Song’ 、Disneyland
Summer Musical Parades (L.A.).
美國1984年奧運開幕典禮
美國廣告：可口可樂 with Micheal Jackson
香港：亞洲電視 音樂/ 旅遊 / 及各類節目主持、電視劇集.
台灣/中國：電視劇集
教育工作：香港及中國- 司儀/主持........................
我的BLOG
-
演藝生命有否期限
2012-03-06 11:16AM / / 亞洲電視 陳靖允
( 照片 : 南斯拉夫 旅遊特輯 陳靖允洪潮豐 )
離開亞洲電視有七年？
說離開？
是說 脫離與亞洲電視的合約關係，
但是在這七年間，
我以自由演員身份和亞洲電視合作的有好多次，
平均一年有一至二部劇集，
所以我從來沒有真正離開的感覺！
衹是當有些事發生時冇咁上心，
聽到！見到！亞洲電視Ｄ新聞時會有少少都唔係切身關我事啫，
不過如果外間有人講起，
我又會有好上心咁去分析亞洲電視嘅新聞！
到底係我自己
定係Ｄ人覺得我係亞洲電視人
而令到我放唔低呢？
其實當一個演員，我地一旦踏入娛樂圈，就冇得話夠期離開，
好似最近，
有好多唔見好耐嘅演員喺唔同地方返番嚟香港現身，
又或者喺唔同行業回歸到螢光幕，
佢地離開時可能都有講過話唔做啦！
咁佢地係咪夠期啦？咁有Ｄ仲過晒期囉！
點解佢地又重現我地眼前！
而我地又欣然接受呢？
所以演藝生命又點會expiry？？？
點會過期？點會夠期呀！
演藝事業同其他事業唔同，
演員係一種天生有表演天分嘅人，
直直生喺Ｄ血入面，
(大部份啦)
呢種天份並唔係我地長大左後天去培養嘅手藝或技能，
藝術天份培養唔到，演員一定要有本身嘅天份，
所以當我地投入左呢個事業，就好難跳番出！
嗰種心思思嘅感覺，恨不得跳番入去嘅心情，
呢Ｄ
己經唔係金錢！合約！
夠期！過期！嘅問題咁簡單！
2007 copyright 陳靖允 陳迪華 siana
-
澳門風光 * 藍天白雲
2012-03-06 11:14AM / / 亞洲電視 陳靖允
澳門..一個令人沉迷在金錢世界的地方，
想不到居然會有如此優閒的意境！
看着海中小舟，沉醉在大自然懷抱！
令人別有一番滋味在じ頭！
一轉眼
又回來醉生夢死的花花世界！
上星期我公司在澳門做了個活動，完成工作後的第二天！
看到藍天白雲、天氣晴朗，じ情都連帶好起來，
掃走了え前準備功夫的身じ倦意！
我地去左澳門東方文華食 lunch，
主要是食我至愛的文華芝士蛋糕！
正！！！
然後我坐朋友嘅保時捷去吹風，
沿途澳門風光，差點忘了自己所在，
我忍唔住用手機拍低如此藍天白雲，
然後
好開心咁踏上歸途
返香港！
2007 copyrigh陳靖允 陳迪華 siana
-
栢林畢業啦！
昔日的小栢林己經大個仔，大學畢業之後，考入左警察學校，在今年八月就完成訓練，做一個保護我地嘅大丈夫啦！
-
環保意識-夢遊污境
演員表：
盧俊豪飾演爸爸 / 陳靖允飾演媽媽 /
康飾演垃圾佬 / 游飈飾演怪媽 /
健仔飾演哥哥 / 萌姐飾演怪哥 /
Vicky飾演妹妹 / 劉錫賢飾演怪妹 /
第一場
〔舞台背景是一個翠綠山林，同時不斷有雀鳥聲音〕
〔設定觀眾的方向是一個湖〕
〔這時一家人走進來，當中包括，爸爸、媽媽、哥哥和妹妹〕
哥：(享受著) 黎到郊外，真係零舍舒服！
妹：(向觀眾方向) 你睇前面個湖Ｄ水幾清！
爸：又係喎...... 呢度環境咁好，不如就度野餐咯！
哥、妹：好呀！
母：你地估下媽咪帶左Ｄ咩黎俾你地食？
〔哥、妹心急之際，母從袋中取出一個杯麵，哥、妹馬上臉黑〕
哥：邊有人帶杯麵去野餐架？！
母：方便丫嘛！食完「黎」手掉左個杯佢就搞掂喇！
妹：你知唔知食一個杯麵會製造幾多垃圾？
母：咪一個杯囉。
哥：係一個聚苯乙烯杯。
爸、媽：即係咩呀？
哥：發泡膠杯！
妹：Ｄ人成日貪方便用發泡膠產品，結果而家堆填區每日要處理成百噸發泡膠廢物......
母：車，咁我就算真係製造垃圾，都只係一隻發泡膠杯......
妹：點只，仲有密封膠袋，包裝紙盒，同埋你又唔帶筷子同叉，咁又要用即棄膠叉同木筷子，跟住又一個超級市場膠袋，仲有......
母：仲仲仲，仲你個頭，有得你食就唔好咁多野講啦。
哥：阿媽，就算你真係想食杯麵，咁你都要有熱水至得架......
爸：(已拿著一個電熱板) 有呢個最新產品，旅行電熱板咪得囉... 佢係用乾電池，去到邊都用得... 要煲熱水，幾分鐘就得...
〔爸拿出一個煲和一樽膠樽水，煲水準備煮麵〕
哥：你地咁都算野餐？！
妹：(向哥) 我地呢個月下午茶都係食杯麵…咁食法會唔會死架？
哥：(向妹) 死就唔會，不過就會無乜營養囉。
媽：(聞四週) 週圍到底係Ｄ咩味？咁臭？！
妹：(聞一聞) 係臭草呀…不過都係少少味，陣間有Ｄ風就會散…
〔這時，媽已拿出一瓶壓縮氣樽的空氣清新劑，到處噴〕
哥：人地去郊外係想吸新鮮空氣，媽咪你就去到郊外都仲要噴空氣清新劑！
媽：我只係想僻走Ｄ臭味，淨化下Ｄ空氣！
哥：空氣清新劑，係唔可以淨化空氣架，佢只可以將一Ｄ異味淡化！
妹：係呀，而且你用係壓縮氣體，佢係會破壞地球臭氧層架！
媽：我只係噴左少少野，駛乜咁緊張呀！
〔在哥說媽的同時，爸已把杯麵包裝拆開，倒進熱水，然後就把包裝紙隨處亂掉〕
妹：阿爸你你唔好掉垃圾？！
〔爸驚覺地望望四週〕
爸：返度？返度……都無人…(發現附近無人) 嚇得我丫，仲以為有食環署添！
妹：就算無食環署，你都唔可以亂拋垃圾架！況且你呢Ｄ塑膠垃圾，會對環境造成嚴重破壞，所以一定要好好處理......
媽：你兩個咪成個阿伯咁依依哦哦，我地黎郊外係要Release架嘛！
〔這時爸發現電熱板沒電〕
爸：Ｄ電池咁唔襟用，又要換新。
〔爸把換出的電池掉向前方湖中，哥、妹即緊張〕
哥：Ｄ電池唔可以掉去湖入面架！
爸：你驚電死Ｄ魚？
哥：我地係唔想你污染個湖！
妹：你知唔知一粒電池，可以污染600頓水！
爸：(扮驚訝) 係？！(望望湖) 但我睇呢個湖都唔只600頓水啦，無事！
〔這時一個垃圾佬走到附近，邊檢垃圾邊說〕
垃：到有事果陣，你就後悔都黎唔切。
爸：你個垃圾佬咁多事？！
垃：你地有無聽過一個湖，叫做「伊利湖」？
哥：我知，伊利湖係世界第十一大湖！亦係美國五大湖之一！
〔媽聞言找出地圖看〕
垃：伊利湖本來水又清，魚又肥，但六、七十年代，因為受到當地人日常生活污水污染，令個湖磷質過盛，於是生滿海藻，令到湖水缺氧，同大量魚死亡，搞到臭氣沖天，甚至被定為生物滅絕死亡區域。
妹：咁後來點呀？
垃：經過政府挽救，同限制排污，Ｄ湖水終於都唔再臭。
哥：咁咪好囉。
垃：不過湖毒素仲未可以清除，湖入面魚同水，都仍然唔可以食用……
妹：咁恐佈？！
爸：嚇鬼咩你！
媽：咪係 (指著地圖) 果個乜鬼伊利湖，響無雷公咁遠，關我地咩事？！
垃：咁你地就有所不知 (派小冊子) 拿，份小冊子，入面就有提到環保係唔應該分地區，分國界......
媽：你就唔好煩住我地啦！
爸：你死鏍住咁，係咪想要垃圾？！俾幾個膠樽你喇！
〔爸遞上空膠樽，垃圾佬不屑地白了一眼，便走開〕
妹、哥：阿爸阿媽，你地唔可以……
爸：你兩個就少管Ｄ閒事，難得黎到郊外，梗係要嘆番夠本……
〔爸隨之拿出一個流動小喇叭，並開得十分響亮…〕
〔開著音樂，爸舒服地躺在地上睡……〕
爸：咁樣訓覺幾舒服！
媽：我就鍾意去影相多Ｄ喇！阿仔阿女去邊幫媽咪影相！
〔媽領著哥、妹離開〕
〔爸繼續睡，看似已經睡著〕
第二場
〔隨著音樂變化，後面佈景轉換…轉為一個海底景〕
〔爸快要睡醒的伸伸懶腰…〕
爸：真舒服……
〔爸醒來，看看旁邊，發現無人〕
爸：咦，人呢？去晒邊度呢？
〔爸起身四處張望在找家人…〕
〔這時一個鬍鬚的麻甩佬(游)走近〕
爸：唔該，我想請問有無見過一個女人同兩個細路？
〔那人看看身後又看看爸〕
怪媽：你問我？
爸：係呀，我問你呀，我唔見左對仔女同個老婆！
〔那怪人聞言氣憤，竟上前捏爸…〕
怪媽：你個死佬…你話唔見左邊個話？！
爸：(覺奇怪)…我話我唔見左個老婆同仔女…
怪媽：豈有此理！咁大個老婆棟度，你竟然話要搵老婆？！
〔爸一頓，看看那人又看看四週〕
爸：你話邊個係我老婆話？！
怪媽：我話我係你老婆！！
〔爸忍不住狂笑〕
爸：大佬，你唔好搵Ｄ咁野玩？！
怪媽：你同我睇清楚，呢Ｄ咩黎，你認得喇嗎？
〔怪媽捉住爸，要他看著自的背後，爸馬上又愕然又驚訝〕
爸：七星伴月？！七粒有毛墨，夾住一個千年大孖瘡！！
怪媽：你終於都認得！
爸：你真係我老婆？！點解你會搞成咁？
怪媽：你係咪失憶呀你？！你記唔記得我地成日食杯麵，又鍾意食零食，仲好多時會將Ｄ古靈精怪野，放埋入杯麵度一齊淥？
爸：係呀，你話時間就係金錢，咁樣可以慳好多時間，而且又快又好味... 我仲記得杯咖喱海鮮杯麵，加香蕉朱古力餅乾，然後再放Ｄ特辣棒棒糖......
怪媽：咁你知唔知，我地食咁多古靈精怪野，會有咩後果？
爸：咪肥Ｄ囉。
怪媽：原來Ｄ零食唔單只糖份高、鹽份高，而且仲有好多人造化學成份......
爸：(猶疑) 係咩...
怪媽：仲有個杯麵，你知唔知，我地食杯麵，同Ｄ漂白水、洗潔精、牙膏、漆油、殺蟲水有咩關係？
爸：無關係！
怪媽：錯，果Ｄ野，同Ｄ杯麵，或者即食麵都有相同化學成份架！
爸：有無咁誇？
怪媽：梗係有！原來好多杯麵同即食麵入面，都含有碳酸鉀、碳酸鈉 同埋硫酸鋁鈉，呢Ｄ野，食左之後，會減弱肌肉強度、皮膚乾燥、高血壓、性緒低落 、噁心……
爸：得得得得得！你而家咁講我都已經夠嘔心……(望望怪媽)你就因為果Ｄ化學成份而搞成咁……
怪媽：(感嘆)唉…想當年我果副嬌人身栽，迷人美貌……
爸：乜你有過咩？
〔怪媽怒盯著爸，這時爸忽然又想起…〕
爸：係喎，咁對仔女呢？佢地又點呀？
〔這時一個穿著哥的球衣和鴨咀帽的人進來(萌姐)〕
怪哥：阿爸？！
〔爸望望怪哥，向著怪媽一副摸不著頭的樣子〕
爸：你係妹妹呀？
怪哥：我係你個仔呀！
爸：(驚訝)你係我個仔？！！點會咁架…阿仔你又唔鍾意食垃圾食物，生活又健康，點解都會搞成咁？！
怪哥：阿爸，就算我平時幾小心都好，有Ｄ野真係防不勝防架…
爸：(問怪媽) 究竟係咩搞到個仔咁架？
怪媽：一日都係你，成日將Ｄ廢電池亂咁掉？
爸：係，我係試過將Ｄ電池掉入湖入面……就係因為果舊電池？
怪哥：我地都同你講過一粒電池可以污染600頓水！如果你將一舊大電放入泥土裡面，咁果一平方米土地就永遠都唔可以種植…而果Ｄ有毒物質，亦都滲入地底，污染地下水……
爸：但係地球有70%係水，點會咁易污染得晒？！
怪哥：地球有70%係水，但係大部份都係咸水，而真正可以俾人食用水，其實唔夠一個%
怪妹：(人隨聲至)我地食水資源已經少架啦，但Ｄ人從來都唔珍惜喎！
〔爸回頭一看，一個又肥又大隻，卻穿著一條和妹妹一樣的裙的人，一步步走近〕
爸：你又邊位？
怪妹：我咪係囡囡囉！
爸：(不能接受)你係我個女？！
怪妹：爸爸抱抱！
〔怪妹見爸就想過撲過去，爸怕得要走〕
〔爸走兩步，就覺喘氣〕
爸：點解呢度抖氣咁辛苦…
〔怪媽、妹、哥停下來，一齊呼吸(用腮) 〕
怪妹：唔係丫，空氣幾清新呀。
爸：但係點解我抖氣抖得咁辛苦？係咪Ｄ空氣污染太嚴重呢？
怪妹：車，Ｄ陸地上空氣，一早就污染到唔可以呼吸啦！
爸：？！但係…點解你地又無事？
怪哥：因為我地已經進化左，走左入水底生活。
爸：人點可以水入面生活？
怪妹：以前Ｄ人用肺呼吸，就唔可以水入面生活，不過我地而家人，都已經可以用腮呼吸……
怪媽：我地而家已經成為兩棲類動物。
怪妹：(邊說邊做動作) 你睇我地而家水入面，幾自由自在，
爸：(驚訝) 水入面？
〔爸隨之感到窒息〕
妹：爸爸你點呀？
怪哥：阿爸你好似仲未有腮喎…
怪妹：咁就要快Ｄ捉佢去做手術，加番個腮喇！
爸：(掙扎) 你地想點呀？
怪妹：阿爸快Ｄ去做手術！
怪哥：唔係你就會死架喇！
怪媽：跟我地走啦！
〔三人追著爸，爸逃命狂奔〕
爸：唔好呀！
第三場
〔舞台轉變，變回翠綠山林，爸躺在台中做著惡夢〕
爸：唔好呀…唔好呀…唔好呀！！
〔爸扎醒，緊張地看看四週〕
爸：原來發夢…(摸摸自己兩腮) 好彩，無俾人捉去做手術加腮...... 不過真係估唔到，原來唔環保係會有咁嚴重後果。咦，老婆呢？！阿仔！阿女！
〔這時正常的媽出來〕
媽：做咩呀，鬼殺咁嘈。
〔爸一見媽，即上前看真媽〕
爸：老婆，你真係越睇越靚…
媽：你發咩神經呀？
爸：我唔係發神經呀，我而家先發覺，健康飲食，加上環保生活，原來係好重要架！我地以後都要食得健康，用得環保...... (搶過媽手上的零食) 所以呢Ｄ垃圾食物，我地以後都唔好掂！等老婆你可以永遠都Keep得咁好。
〔爸一手將媽手上的垃圾食物扔走，媽卻目定口呆的看著〕
〔媽用手摸摸爸的額頭〕
媽：你又無發燒，點解講野語無論次.....阿仔，阿女，你地過黎睇下你阿爸！
〔仔女隨之進來，爸見到仔女，開心的抱住〕
爸：阿仔阿女，見番你地真係好。
妹：阿爸佢做咩？無端端咁熱情？
爸：唔駛擔心，我無事！我只係忽然間醒覺到，應該要好似你兩個咁，環保Ｄ！
哥：車，阿爸你成日都係得個講字，而且，你兩個一向都係浪費兼大駛，要變得環保，得唔得呀？
爸：得！咩唔得？！
妹：我都係覺得阿爸唔多妥，不如我去買樽水俾你飲啦！
爸：唔駛！我唔想浪費多個塑膠樽，我記得阿女你有帶水壺黎，你個水壺俾我就得！
〔眾人愕然反應〕
爸：你地咪以為我唔識，而家香港每日都有成五十萬個棄置膠樽，剩係呢Ｄ膠樽都已經用左堆填區唔少位。
媽：車，而家個個都話搞回收，咁收晒佢咪得囉。
爸：回收係需要成本，香港每噸膠樽回收成本係四千蚊，但仲未計清洗同篩選費用喎，計起上黎，係入口材料兩倍，咁你話有幾多人願意做回收工作。
媽：就算係咁，掉晒去堆填區又有咩問題喎，填多Ｄ地，起多Ｄ樓，賺多Ｄ錢，咁唔好咩？！
哥：阿媽你到底知唔知Ｄ塑膠廢料對我地有幾大影響？舊年有艘載滿塑膠廢料貨輪塔門對開沉左，到而家仲有一個貨櫃未撈起，結果Ｄ塑膠廢料令到海受到污染，區海膽及鮑魚絕跡，附近養魚場亦有大量魚死亡，二百個漁戶受影響，有漁戶損失成十幾萬......
妹：只係一個貨櫃就可以搞成咁，你諗下我地每日會製造五十萬個廢置膠樽！
爸：外國已經有國家禁止使用膠樽。
媽：但係香港無喎。
妹：咁我地咪自己自律Ｄ囉！
爸：唔單只要少用膠樽，電池都唔可以立亂掉！所以... 我想執番我掟左落湖舊電池......
〔爸想跳落台，但被哥拉住，哥拿出一塊電池〕
哥：頭先我已經幫你撈番上黎喇！
爸：咁就太好喇！
妹：我地唔會俾阿爸你做污染幫兇！
爸：(望真) 不過... 我頭先掟落湖舊電池，好似唔係咁樣架喎......
哥、妹：？！
哥：咁快Ｄ去撈過啦！
妹：咁我去搵多個網先...... (看著媽的帽) 阿媽借你頂帽黎用下！
媽：你唔好搞我頂帽呀......
〔妹搶過帽就走，媽馬上追上跟著走，剩下爸一人在〕
爸：(擔心) 死啦，如果電池撈唔番，咁大家會唔會又試變型架......
〔垃圾佬又進來檢垃圾〕
〔爸見狀，竟一起幫他檢〕
爸：等我黎幫你，我都想為環保出一份力！
垃：(不屑) 超......
〔垃圾佬鄙視的走開…〕
〔這時媽回來，已經沒再戴帽〕
媽：激氣，佢兩個真係我頂帽去當網黎用！
爸：咁你咪當為環保出一份力囉！
〔這時兩個人出現在爸眼前，那正是在夢境中，那古怪的哥哥和妹妹〕
〔爸見狀一驚〕
爸：阿仔阿女！乜你地又變成咁？！(向賢)阿女，乜你話肥就肥？！
賢：喂你邊位呀？咪摸身摸世。
爸：(指著萌)乜你唔係阿仔咩？
萌：阿生，你唔係連男女都唔識分嘛？！
爸：…咁…
〔這時也進來〕
：喂，你地搵到老豆未呀？
爸：下…你……
〔爸看看，又看看老婆，才確定自己不是發夢〕
：先生，請問你有無見過一個，附近執垃圾老人家？
爸：我地見過…頭先都仲響度。
〔哥、妹失望進來〕
哥：阿爸，我地搵唔番你舊電池...
〔時垃圾佬進來〕
垃：你地係咪想搵呢舊呀？
〔爸、哥、妹看到電池，馬上高興起來〕
爸：係呢舊喇！
妹：好囉，阿爸你終於都唔駛做破壞環境罪人！
〔、萌、賢看到垃圾佬〕
、萌、賢：阿爸！
爸：乜佢就係你地阿爸？！
萌：阿爸你搞乜又走去執垃圾呀？！
媽：睇唔出你地幾個身光頸靚，竟然由得個老豆去做垃圾佬！
：我阿爸佢唔係垃圾佬！我地係美國華橋！我阿爸佢大把錢！
萌：我地仲湖邊有間大屋，又管理湖入面幾個沙灘，仲有自己船隊湖入面捉魚添！
爸：你地講，係咪伊利湖？！
垃：(瞪眼望爸) 你又知... 唉，不過呢Ｄ都係以前事咯... 想當年，我伯爺佢地岩岩到美國，果時伊利湖水產豐窗，又有延綿千里森林，而且仲有唔少礦產。
賢：時我地已經大把生意！
垃：到後來，Ｄ人為左方便，就開鑿左幾條運河，將五個湖連埋一齊，成為左美國出名大湖區。之後湖沿岸就開始繁榮起黎，底特律、芝加哥呢Ｄ工業成事都開始出現！
：於是我地就變得仲有錢Ｄ！
垃：不過，工業發達就令到污染嚴重，附近化學藥物、油、工業廢料全部倒晒入湖裡面，1969年6月，流入伊利湖克亞霍加河，因為污染嚴重而突然起火，果把火仲將河上面一座橋燒毀。呢件事令成個美國震驚，而自此之後，伊利湖就俾人叫做“死湖” 。而好多湖灘同旅遊設施，亦開始陸逐封閉......
萌：(傷心) 於是我地生意就一落千丈......
〔萌、、賢抱頭痛哭〕
：我地本來有成600億身家......
賢：而家得番60億......
媽：車，我仲以為你地搞到破產添！
垃：我地就無破產，但係政府為左挽救個湖所投入資源，就遠遠超過我地無左身家！
哥：我知，每年當地政府都要做詳細水質測試，去話俾人知可唔可以落水玩。
妹：而美國太空總署甚至要用衛星，一直監察住個湖變化！
垃：其實錢係小事，環境污染左至係事大... 經過呢個經歷，我就決定，要令所有人提高環保意識，一齊去保護一Ｄ未被污染地方，同一齊挽救一Ｄ被破壞左地方！
爸：好！做得好！應該咁做
哥：阿爸，你似乎有Ｄ變左喎…
爸：變得環保Ｄ唔係更加好咩？
妹：咁不如我地幫手執乾淨呢度！
哥：咁我就去俾多Ｄ人知道，保護環境重要性！
眾：好！
〔有人執垃圾，有人落台派環保小冊子〕
完
-
河源 * 萬綠湖 的綠
2012-03-06 11:14AM / / 亞洲電視 陳靖允
上星期公司接受邀請到中国河源參加一個
名叫 ' 萬綠河源 ' 的旅游主題推介，
為期三天！
行程應該是非常好玩？
不過試想想在猛烈太陽下，3x幾度的日子，
小妹自問身體弱，受唔住咁熱嘅日子周圍走！
比我可以選擇我寧願留喺屋企，
Sorry..大會
可唔可以將Ｄ風景打包寄俾我呀？唔該！
不過我無得選擇！
sorry...Siann
第一日入住 御臨門 温泉酒店
我入住嘅房好正喎，喺咪好有異國風情呢！
呢間酒店係用左印尼巴里島嘅味道！
一落車就會有著左尼民族衫嘅女仔跳舞俾我地睇！
不過我當時一手都係行李，所以冇影相！
但係我嘅じ情開始好少少！
上/下 圖都係喺我間房影出去，對面再行入去就係温泉區啦！
呢邊係我地食晚餐嘅地方！Ｄ野食一般！
I mean 真係好一般！
不過你同我都志不在食啦！
第二日我地主要去 河源萬綠湖 同埋 鏡花緣！
真架！真係有個鏡花緣架！
(咪以為剩係拍戲先有吖)
假假地我都叫做拍過鏡花緣
假假地地我都叫做演過女兒國嘅國主架！
都有Ｄ期待架！
不過行完成個 '鏡花緣' 令我真係有Ｄ失望！
因為佢地隨便一個亭就話係女兒国？
冇任何特色？
是旦 一個山 穴 叫紅顏島？好似...
我叫紅顏島做女兒國你都分唔到喎？
萬綠湖另一面有個水庫，坐小舟出去，好寧靜！
下面幾張相就係 萬綠湖
湖水好綠好靚！
我坐喺船上(同水庫嘅小舟唔同)，
舒服到想瞓覺覺！
而湖水的綠真係好靚！水好清！
清到好想飲左佢！
我想..原來己經有好多人係喺度飲萬綠湖嘅水！
想知邊個？下次話你聽！
而家先欣賞下Ｄ風景先啦！
