坐廁的存在價值

其實題目應訂為「公共坐廁個塊板的存在價值」。我想說的，是一般人在家中會坐在上面的那塊板。

問過身邊的朋友，十個用公廁的，有十五個都係「空氣椅」。大家都練成一身好武功，更試過茶餘飯後，以「邊套武功最好」為話題，傾左成粒鐘！

「空氣椅」緣自上乘武功的同一基本功 ----- 「紮馬」，同時又相傳緣自一位家長或老師想出來的「加料罰企」-----「無影凳」。真正源頭未知是哪個。

其實空氣椅真係好考功夫。要以「唔整污糟俾人坐個塊板」為大前題，但係要係設計俾人大概比九十度曲腳小少少 (即曲少d，似d企，又或者無咁似坐，總之係坐和企中間的一款動作) 的坐廁上，以「類似坐」的姿勢平衡身體，成功如廁。

寬敞的廁格還好。有些地方，廁格細到你行左入去，最好爬上個廁所水箱先，唔係關不到門；腳要分得很開，總之在「U型」廁所兩旁有小小位，剛剛攝雙腳入去，前面就肯定唔夠位你企 (或坐。其實這個設計，根本什麼姿勢都係如廁甚艱難，除褲時又除唔到，要著返條褲時仲唔知點好。著裙的會好少少)。

咁辛苦，不如去「蹲廁」(找不到個mou字) 啦！唔得，mou就真係成個人...... mou晒落去。總之mou廁就唔得啦！

明查暗訪下，發現大部人將坐廁同文明和先進畫上了等號，而mou廁就好「大陸」。先聲明這並非歧視。是那些捱過世界的，都認為係發左達的才會可以在家中裝個「英式坐廁」。所以覺得去廁所mou得越低，社會地位越低。而未捱過世界的，則家中至少一坐廁，出街做乜要mou呢？有張凳你「坐」，同要你「mou」，點會有凳唔坐呢？

回到「有凳唔坐要空氣椅」的課題上 (咪正正係有凳你坐你唔坐囉)。塊板好多細菌，唔掂衛生d；唔知上一手得手定失手，抹返乾都係好核突； (以下這個，自從空氣椅的普遍後，已經少之又少) 上一手都唔知係坐定企，隱約好似有對腳印...... 以上的小部分原因，都言之有理bor。係囉，唔空氣椅真係唔得wor！

好啦，即係點都應該空氣椅，咁塊板拆得啦！無左塊板，咪無左「之前坐定企」、「坐唔坐得過」的疑問囉。下？又唔得？係bor，拆左塊板，咁同mou廁有乜分別呢？

高d囉！咁不如將所有mou廁都升高晒，做到坐廁的高度咁，係咪perfect晒呢？

咦，有微弱的反對聲音：我去細就空氣椅，去大唔得架，要坐架；我其實唔係好識空氣椅，除非環境太惡劣，或者急到做唔切勞作，唔係我寧願自製勞作 ----- 紙廁板 ----- 圍住個窿鋪五十層廁紙......

講左咁耐，得出的結果是：坐廁個塊大家都怕怕的板，唔拆得。

似唔似政府個d成立個獨立調查小組，查左幾個月之後，向傳媒、大眾公佈調查結果。係報告上面，全部都係你係未見個獨立調查小組成立之前已經完全明解的事實。

即係如果有人示威時問候d高官「你仲係咪人黎架？」，高官定必冷靜回應那位市民：「對於剛才那位市民的提問，政府一定會給予大家一個滿意的答覆。而家我地成立一個獨立調查小組專責調查剛才的那個問題。」幾個月之後，個調查小組阿head就會係好多支咪後面讀份報告，證實高官一直都係人一個。

又回到「坐廁那塊板」的問題上 (我真是為了這個問題去寫這篇的)，我認為既然有唔少商場廁所都有幾格mou廁提供俾想用既人用 (其實mou廁真係好用過坐廁。皮膚一定掂唔到其他人的遺留物，個窿又大咁多，好難會失手。同埋mou廁得一種用法，就係mou，唔使係上一手出黎時用佢個外表估下佢頭先係入面點去......)，咁不如又整d無坐廁板的坐廁。甚至將之化作主流，有塊板的才是那種得幾格標明晒的。

把家中那套拿出來，不是永遠都會合適。我係屋企梗係坐啦，你估練腳骨力咩？不過出到去，真係坐唔落...... 尤其聽了大大小小不同類型的「失手秘聞」和大家的處理方法後，真係......

最後，回應返我這篇的主題。公共坐廁個塊板的存在價值？咪就係話你聽，那個不是遭人破壞到連廁板都偷走埋的廁所囉！(但就算係無左個塊板，你咪又係空氣椅咁去。你一定係超急啦！唔係急到忍唔到，你先唔會去公廁啦，忍到返屋企嘛！又咁長龍咁辛苦先排到一格...... 照去！唔識空氣椅都要硬住頭皮試下。試多幾次，你就識架啦！真功夫係要迫出黎架！)

for your interest: